{ مرّت سنة }

مَرّتْ سنهْ والجَرْحْ باقي ويكبر ..

مَرّت سنه والحزْن يقرى بـ ترتيل

مَرّت سنَهْ يابوي والقلب مجمر ..

ذابت شرايينه من الفقد والويل 

صوت البكى ماعاد باليدّ يقهر ..

ودمع العيون اللي انهمر كنّه السيل

هذا الفرح من غبت ما هو بـ يذكر ..

رحل معك يابوي .. ماعاد قنديل 

شاحب زماني وجهه اليوم مسمر ..

لحظة وفاتك يا يُبه هَدّت الحيل

ذكرى وفاتك يا يُبه مثل مَنْظر ..

بـ شاشة خيالي ينعرض لحظة الليل

يا ليت شاورنا القدر قبل يَكْسِر ..

حلمٍ كساه من المقدّر غرابيل 

كان العوض يابوي والله يِحْشَر ..

من مشرق الدنيا إلى الغرب ترحيل

ما قدّر المولى له العبد يَشْكِر ..

لكن وفاتك حَطّمت فرحة الجيل 

يا من نكبّر بـ اسمك اللهُ أكبر ..

اجعل لـ ابي في جنّتك خير تنزيل

يوتيوب

--- >{ يا يُبه }< ---

يا يُبه حسّ صوتك .. ألتفت له صِدَح ..

مَرّ طيفك عزيزٍ يا حبيبي وغاب 

يا يُبه من غيابك .. غاب معك الفَرَح ..

والحِزِنْ في فؤادي كبْر ذيك الهضاب

يبطي دمع المحاجر .. لو هَطَلْ ما شَرَحْ ..

وش بقلبي من أسى من هموم وعذاب 

من وفاتك حياتي .. اكتست بالتَرَحْ ..

وانكسر غصن قلبٍ من غيابك خراب 

أتعبتك الحياهْ .. وساكنٍ ما سَرَحْ ..

ضيفٍ اثقلْ وأقسى من جبالٍ صِعاب 

المرض في جسدك .. وفي عيونك وِضَحْ ..

واكتسى قلبْ طيبه .. مثل وبل السحاب 

جعل ما جاك والله .. يا أوبيّي طَرَحْ ..

يغفر الله ذنبك بـ احتمال المُصاب

ربي اجعل جِنان الخُلد .. له مُطّرّح ..

رحمتك يا إلهي دعوةٍ تُستجاب